ஸ்விஸ் வங்கிப் பணம்

கருங்குகைக்குள்
அடைபட்டுக்கிடக்கும்
வண்ணப்புறாக்களே

உங்களை அடைத்தவர்
மனம் நிம்மதிப்
பெருமூச்சு விட்டு
ஓய்வில் மறைகிறது

விடுதலைக் காற்று
வீசவே வீசாதா
கவலை வேண்டாம்
காலம் கனிந்து வரும்
காத்திருங்கள்

அற்புத விளக்கோடு
அலாவுதீன் வரலாம்
எப்போது என்றுமட்டும்
கேட்காதீர்

திருடனாய்ப் பார்த்து
திருந்தும் நாள் வரும்
நம்புங்கள்
பொருமைமட்டும்
காத்திடுங்கள்
வேறென்ன சொல்ல
சுவிஸ் வங்கிக்
கறுப்புப் பணமே.


 
  
 
      

     

வாழ்வு

நினைவென்னும்

பசுமை நிறை 

அழகுச் சோலையில்

அங்குமிங்குமாகப்

பறந்திடும்

இளந்தளிர் நிலவுகள்

அன்பெனும் குளத்தில்

அவர்களுடைய அன்பின்

சாட்சிகளாயிருந்தன.

சில நேரங்களில்

அவை மலைகளின்

மறைவில் மறைந்தும்

அன்பெனும்

ஊஞ்சலில் ஆடியும்

அகமகிழ்ந்து

திளைத்திருந்தன.

ஆனால் இப்போதோ

சரியான புரிதலின்றி

அந்த அழகு நிலவுகள்

மழை மேகங்களால்

மறைக்கப்பட்டு

இடியும் மின்னலுமாய் 

இடித்து நொடித்து

துன்ப அலைகளில் 

கரைந்து

விவாகரத்தில்

முடிந்துவிட்டன.

 

 

  

    

  

     

      

  

வாழ்கிறேன்

கலைந்துபோன

கனவுகளைக்

கல்லறையாக்கி

வாழ்கிறேன்

பொய்யென்ற

கண்ணீரிலே

நனைந்து

வாழ்கிறேன்

பொருளில்லா

விவாதங்களின்

கனவாக

வாழ்கிறேன்

வரமாட்டாய் நீ

எனத் தெரிந்தும்

நாட்களை

எண்ணியெண்ணி

குமைந்து

வாழ்கிறேன்

தனியாக

விட்டுச்சென்றவனே

உன் காலடியோசையின்

இருட்டிலும் தான்

வாழ்கிறேன் நான்.

    

          

  

  

காத்திருக்கிறேன் இறைவா

  








வானமென்னும்
வீதியிலே
வண்ணத்தாரகையாய்
நீந்திட
ஆசை

நேரமென்னும்
காலச் சக்கரத்தை
நிறுத்தி
விளையாடிட
ஆசை

கணினி என்னும்
மாய மந்திரத்தை
மயக்கி
வென்றிடவே
ஆசை

காயமே இது
பொய்யென்ற
காலனின்
கடுமையை
அடக்கி ஆண்டிடவும்
ஆசை

நேயமே இல்லாத
அரக்கர்தம்
மனதை
கீறிப் பார்த்திட
வெறியான
ஆசை

பொய்ம்மையில்
மூழ்கி
தன்னலம் கருதும்
போக்கிரிகளை
மறுமையிலும்
தண்டிக்க
ஆசை

ஆசைகளை
ஆழக் குழிதோண்டி
புதைத்தால்தான்
அமைதி வரும்
என்னும்
எண்ணத்தைப்
போற்றவும்
ஆசை

இவ்வுலகில்
முடியாத
ஆசைகள்
அவ்வுலகிலாவது
நிறைவேறுமா
காத்திருக்கிறேன்
இறைவா.




      
  

  
    
    
 

   
   
   
 
 
 









  
 

பகற்கனவு இனி வாராதுகாண்

புள்ளிமான் கூட்டம் ஒன்று
துள்ளி விளையாடிய அழகை
அள்ளிப் பருகிய காலம் அன்று

கவலைகளே மணல் மேடாகி
சவலையாகிப் போன மனதால்
திவலையாய் விழும் மழைகூட

மன ஊஞ்சலில் அமராமல்
கனவுகளும் கவலை மயமாகி
முனகிடும் வாழ்க்கை வாழும்

நிலைமாறி ஒளி வீசுமா
மலையேறி எதிர் கொண்டால்
விலையில்லா வாழ்வு மலரும்

உண்மையிது உறங்காதது
திண்மை வேண்டும் உள்ளமதில்
வெண்மதி ஒளிவீசும் வாழ்வில்

இயற்கை அழகு இனி மிளிரும்
செயற்கையில்லை செயல் திறனிது
பகற்கனவு இனி வாராதுகாண்.

 
 

ஓய்வு பெற்றவரின் கண்ணீர்

வார்த்தை வலிகள் 
கொடுத்திருப்பேன் 
நேசித்ததில் 
நிறைகுறைகள் கண்டும் 
நெஞ்சத்து அன்பு 
குறைக்கவில்லை நீ 

உழைப்புக்கு நீ 
ஒத்துழைப்பு நல்கியதில்
பாச மகவுகள் 
படிப்படியாய் 
வளர்ந்தனரே 

நிறைகுறைகள் 
வாழ்வில் நீங்கா 
நின்ற போதும் 
தோள் கொடுத்தாய் 
கல்வி ஏணி ஏறி
கரை சேர்ந்தனர் 
பிள்ளைகள் 

நிலை உயர்வு பெற்ற
மகவுகளுக்கு
மணமும் முடித்து
மகிழ்ந்த வேளையில் 
உன் மனக்குரங்கு 
வன்மம் கொண்டதேன் 

ஒத்துழையாமை 
ஆயுதம் ஏந்தினாய் 
அத்துணையும்
குற்றமென்றாய்
அடிமனது வலி 
என்று அரற்றினாய் 

உட்கார்ந்து பேசவும் 
உடன் படாததேனோ 
இருதலைக் கொள்ளி
எறும்பின் நிலை 
யாரிடமும் எதுவும் 
உரைக்க இயலாது 
ஏற்ற வாழ்வு 
அணை போட

ஓய்வு ஆய்வுக்குறியாகி
சாய்வுக்கு 
தோளில்லா நிலை 
வளமான வாழ்விருந்தும் 
குளம்நிறை சேறாகி 
தளமே ஆடுகிறது 

வேதனைகளின் வேர்களைத் 
தேடிப்பார்க்கிறேன் 
அடியும் தெரியவில்லை 
முடிவும் புரியவில்லை

போதனைகள் ஏட்டுச்
சுரைக்காய்களாய்ப்
போனதில் 
சாதனைகள் 
மழை நீர் மண்ணானதே
கண்ணீர் 
வற்றவில்லையே. 


 

 
    
 
  
 

  

என்றும் நீ என்னோடுதான்.

பார்த்தது ஒரு பெண் தான்
       பரவசமானேன்
ஈர்த்தது உன் கண்தான்
       எழில்ரசம் தான்
நீர்த்தது கனவுகள்
       நிலையிழந்தன உன்முன் 
வார்த்தது நினைவுகள்
       வசமிழந்தேன் நான்

தாயன்பு தனியன்பு
       கண்டேனே உன்னில் 
சேயன்பு சேர்ந்தன்பு
       கொண்டேனே கண்ணில்
வாயென்றும் வயிறென்றும்
       வளம்கண்ட என்னை
காயன்று கனிதானென்று
        கரைத்தாய் நீ

தெரியாமல் செய்திட்ட
        துன்பங்கள் ஒரு புறம்
புரியாமல் பேசிட்ட
         வன்மங்கள் மறுபுறம்
எரிதணலாய் மாறாமல்
         பொறுமை காத்தாய்
உரிமையில் உன் அன்பினை
          புரியவைத்தாய்

தனக்கென கேட்டிடா
          நல் தாயுள்ளம்
எனக்கென என்றிரா
          பொது உள்ளம்
பிணக்கென வந்திட்டால்
          வாதிடாமல்
மனக்குளத்தை வளமாக்கி
          வாழ்வாக்கும் நீ

தனம்பல பெற்று நான்
          தனித்தியங்கும் நிலை
மனம்நிறை மகிழ்ச்சியில்
          நீ மிளிர இப்போதேனும்
கானம்பாடி மன ஊஞ்சலில்
          களித்திருக்க
வானம்பாடியாய் வேண்டும்
          என்றும் நீ என்னோடுதான்.  




  


       
           



n

கனவு பலிக்குமா கடவுளே

உழைத்தேன் உழைத்தேன்
உன்னதம் பெற வாழ்வில்
மறந்தேன் மறந்தேன்
காதல் என்ற ஒன்றை

காலம் கடந்து நினைத்தேன்
கோல அழகு குன்றினாலும்
கொண்ட மனையாளையே
காதல் செய்யலாம் என்று

காதல் காதல் காதல் போயின்
சாதல் சாதல் என்றேன்
போத்தல் ஏதாவது
போட்டாயா என்றாள்

கண்ணே மணியே
கற்கண்டே என்றேன்
பொன்னும் பொருளும்
வாங்கு முதலில் என்றாள்

தனித்திருக்கலாம் வா
தங்கமே என்றேன்
உன்னை மன்னித்தாலல்லவா
தொடுவதற்கு என்றாள்

நடந்ததை மறந்து உலக
நடப்புக்கு வா என்றேன்
கடந்து போன இளமை இனி
வருமா என்றாள்

மறுபிறவி இருந்து மறுபடி பிறந்து
மறக்காமல் காதல் கொள்ள வேண்டும்
வாழ்வு சிறக்க அந்தக்
கனவு பலிக்குமா கடவுளே